Hoe om te studeer

By die skool

1.    Kom elke dag skool toe met die vaste voorneme om daardie dag soveel as moontlik te leer.

2.    Gee in die klaskamer 100% aandag aan die verduidelikings en opdrag van die onderwysers.  As jy iets nie goed begryp nie, moet jy dit dadelik aan die onderwyser sê.

3.    Werk saam en probeer so hard as jy kan om die vrae van die onderwysers te beantwoord.  Steek jou hand op en probeer!

4.    Maak gebruik van jou dagboek deur alle huiswerk, take en opdragte dadelik in te skryf by die datum wanneer dit gereed moet wees.

5.    Sorg dat jy alles by jou het wat nodig is vir die dag: handboeke, skrifte, ’n liniaal, potlood, uitveër, ’n goeie pen, ens., sodat dit nooit nodig is om in die klas van ’n ander leerling iets te leen nie.

6.    Kom goed voorbereid skool toe en moenie tydens klaswisseling of pouses gou iets probeer leer wat jy by die huis moes doen nie.  As jy bekommerd is oor werk wat half voorberei is, kan jy nie genoegsaam konsentreer op die les waarmee jy besig is nie.  Hou jou elke periode besig met die vak op jou rooster.

7.    Wees selfstandig en probeer eerder self ’n antwoord op ’n probleem uitwerk as om dit by ’n maat te probeer kry.

Algemeen

1.    Kweek die regte gesindheid aan teenoor jou skoolwerk. Op stuk van sake werk jy in jou eie belang.

2.    Doen alles netjies, deeglik en sistematies.

3.    Probeer altyd meer doen as wat aan jou opgedra word.

4.    Oortuig jouself van die belangrikheid van kennis. Die soektog na kennis kan ’n opwindende sensasie wees.

5.    Bespreek met elke vakonderwyser die besondere studietegnieke wat van toepassing is op sy betrokke vak.

6.    ’n Ware student het altyd ’n boek en ’n pen byderhand om belangrike dinge aan te teken wat hy wil memoriseer.

7.    Wees eerlik en maak die beste gebruik van die talente wat aan jou toevertrou is.

8.    Doen smiddae eerste jou huiswerk.

9.    Die geheim van sukses op akademiese gebied is om gereeld te werk, op die regte manier.

10.  As jy aan een of ander emosionele steurnis ly wat jou hinder in jou werk, ruim dit so gou moontlik uit die weg.  Raadpleeg jou ouers, vakonderwyser, voorligter, ens.  Daar is baie vriende in jou lewe wat jou graag wil help.

11.  Wees moedig en moenie bang wees vir inspanning nie.  Alleen iemand wat inspanning beoefen, is werklik geregtig op ontspanning.

Studiemetodes: Wenke

BEPLANNING VAN ROOSTERS

Bestee meer aandag aan die vakke waarin jy swak
vaar.  Voordat jy ’n rooster saamstel, moet jy eers bepaal hoeveel tyd jy tot jou beskikking het en hoe doeltreffend jy dié tyd kan gebruik.

Wenke wat jou beslis sal help om meer punte in skoolvakke te behaal:

I      Wees in die regte stemming:

       1)      Daar moet by jou ’n wil wees om te leer en jy moet jou volle aandag aan jou werk gee.

II     Ideale toestande vir leer:

       1)      Die ideaal is om alleen te wees.

       2)      Daar moet nie stremming op jou oë wees nie.

       3)      Sit liewer op ’n harde regop stoel en leer.

       4)      Sorg dat jou lessenaar of tafel netjies is en alle handboeke en skrifte byderhand is.

       5)      Beplan jou werk: besluit vooraf wanneer en waar jy gaan studeer. Dit word aanbeveel om
                 vir 45 minute te leer en vir 15 minute te rus.

       6)      Begin onmiddellik met jou leerwerk – gaan sit voor jou boeke en konsentreer op jou werk.

III    Basiese beginsels van lees:

       ’n Goeie leser lees nie woord vir woord nie,  maar dele van sinne of selfs sinne as geheel.

       Hy konsentreer met al sy aandag op die leesstuk. Hy gebruik ook soveel as moontlik sintuie terwyl hy lees. Leer ook om te onderskei tussen belangrike en minder belangrike leesstof.

IV    Hoe om te leer en te onthou:

Die volgende reëls sal jou help om jou onthouvermoë te verbeter:

       1)      Verdeel jou leerwerk in groot eenhede bv. hou al die werk wat oor een onderwerp handel bymekaar. (Diagramme, tabelle, kaarte en opsommings kan met groot vrug gebruik word.)

       2)      Leer die geheel en nie slegs gedeeltes nie.

       3)      Probeer om die betekenis van die geheel te kry deur bv. te kyk na die opsomming aan die einde van die hoofstuk.

       4)      Wanneer jou leerstof nie mooi inmekaar pas nie, probeer dan om dit te assosieer of te verbind met iets wat bekend is.

       5)      Hou jou aandag by jou werk en vermy meganiese herhaling.

       6)      Probeer om jou leerstof te verstaan.

       7)      Maak logiese opsommings van jou werk.

       8)      Doen hersiening nadat jy ’n afdeling deurgewerk het, herhaal dit om vas te stel wat jy daarvan onthou.

V     As die eksamen op hande is:

       1)      Moenie die aand voor jy eksamen skryf te laat leer nie – ’n helder verstand is meer werd as ’n warboel van feite.

       2)      Vermy gesprekke oor die werk met vriende die volgende dag voor die eksamen.

       3)      Vermy stimuleermiddels en wakkerblypille.

       4)      As jy die vraestel kry, wees kalm en op jou gemak.

       5)      Lees die instruksies op die vraestel deeglik deur voor jy begin skryf.

       6)      Beantwoord die vraag wat aan jou gevra word en nie die een wat jy geleer het nie.

       7)      Beantwoord die vraestel sistematies en moenie rondspring van een vraag na ’n ander nie.

       8)      As jy nog tyd aan die einde oor het, lees die vrae nog ’n keer deur om seker te maak dat jy
                 nie onnodige foute gemaak het nie.