Interskole: Stellies vs Monties!

2008-08-14

HSS is die trotse gasheer van vanjaar se Interskole teen Hoërskool Montana. Die kragmeting beloof om 'n onvergeetlike naweek te wees!

Vrydagaand vind die tradisionele Big Brag in die skoolsaal plaas en Saterdag kom kyk die Old Boys van Stellenbosch en Montana hoe dinge deesdae gedoen word.

Gaan na die Interskole 2008 bladsy vir spanfoto's en die volledige program.

Moet ook nie die artikels in Mikroskoop se Interskole-uitgawe misloop nie!

Mikroskoop Interskole-uitgawe!

2008-08-13

Lees Mikroskoop se spesiale Interskole-uitgawe en deel in die opwinding en afwagting vir hierdie naweek se komende Interskole tussen HSS en Monatana!

Benewens kookwater artikels oor Stellies se sportspanne, bevat Mikroskoop ook die volledige program vir die dag se sportverrigtinge.

Lees jou Mikroskoop Interskole-uitgawe in een van die van die volgende twee formate:

web kwaliteit [604 Kb] druk kwaliteit [2.18 Mb]

HSS verwelkom nuwe skoolhoof!

2008-08-13

HSS wil graag vir mnr. Dries van Wyk van harte gelukwens met sy aanstelling as HSS se nuwe skoolhoof!

Ons vertrou dat ons 'n lang en voorspoedige pad sal saamstap!

Nuwe skoolhoof: mnr. Dries van Wyk hard aan die werk...

HSS nuusbriewe nou ook op webwerf beskikbaar

2008-07-11

HSS se nuusbriewe kan nou ook op ons webwerf gelees word.

Nóg 'n manier om op hoogte te bly van al HSS se aktiwiteite en prestatsies!

HSS ding mee in Amanda Coetzer Uitdaagtoernooi

2008-06-03

HSS se meisies tennisspan is weer eens vanjaar na die Amanda Coetzer Uitdaagtoernooi uitgenooi. Hierdie gesogte toernooi, wat vanjaar vir die 11^de keer aangebied is, het tussen 15 en 17 Mei by Oranje Meisieskool plaasgevind. HSS het 'n skaflike 4^de uit die 6 genooide top spanne geëindig.

HSS se span bestaan uit: Adri Lochner, Lani Scholtz, Salomien Louw, Kerstin Gressmann, Euodia Vermeulen, Jay Dee Warnick en Danél Bruwer (kaptein).

Die span is baie jonk aangesien 4 van ons beste spelers verlede jaar in matriek was.

HSS se meisies tennispan

Geluk aan Salomien Louw, wat onoorwonne was op nr. 3, en Euodia Vermeulen, wat aangewys is as die speler met die Beste Sportmangees!

HSS wen Wayne Ferreira Tennistoernooi!

2008-05-15

Hoërskool Stellenbosch se eerste seuns tennisspan het vir die eerste keer in die skool se geskiedenis die gesogte Wayne Ferreira Tennistoernooi gewen!

Hierdie uiters kompeterende en prestige-ryke toernooi is vanaf 8 - 10 Mei 2008 by St. Stithians in Johannesburg gehou. Dit is die 15^de keer wat toernooi plaasgevind het.

HSS se span het bestaan uit:

• Japie de Klerk,
• Wihan Lategan,
• Willem Frans Marais (kaptein),
• Ben Reynecke,
• Adolf Lategan,
• Adriaan du Toit, en
• Niel Koch.

HSS se wenspan! (vlnr) Ben Reynecke, Japie de Klerk, Adolf Lategan, Adéle van Blerk (bestuurder), Niel Koch, Willem Frans Marais (kaptein), Wihan Lategan, Adriaan du Toit, en Pietie Norval (afrigter - Spier Tennisakademie)

14 van die land se beste skole tennisspanne het in twee groepe deelgeneem. HSS het eerste in die die A-afdeling geëindig danksy Ben Reynecke en Adolf Lategan wat die deurslaggewende dubbelspelwedstryd teen die gasheerskool, St. Stithians, gewen het om die wedstryd met 5-4 te beklink.

In die semi-finaal het HSS teen 2007 se wenners en verdedigende kampioene, Clapham Pretoria, te staan gekom. Hierdie skool bevat baie sterk spelers van dwarsoor Afrika en oefen voltyds by die ITF in Pretoria. Dit het HSS egter nie afgeskrik nie en in 'n titaniese stryd, met baie wedstryde wat eers in die 3de stel beslis is, wen HSS met 5-3.

In die finaal was HSS in puik vorm en het ons weer eens met St. Stithians afgereken. Die spelers het 'n skitterende vertoning gelewer en die wedstryd is reeds ná die enkelspel wedstryde beklink. Die telling was 5-1. St. Stithians moes vir die 2de jaar in 'n ry met die 2de plek tevrede wees.

HSS het deurgaans tennis van hoogstaande gehalte gespeel en die spelers se gedrag was waarlik iets om op trots te wees!

Japie de Klerk en Wihan Lategan was onoorwonne in hul onderskeie 1^ste en 2^de enkelspelposisies.

Dankie aan Seeff wat ons kleredrag borg en Spier Tennisakademie vir hul reuse bydra!

KWEEK! 2008 kunsteweek vier die kunste!

2008-05-09

Die Hoërskool Stellenbosch se jaarlikse kunsteweek, KWEEK!, vind vanaf Maandag 12 Mei tot Donderdag 14 Mei plaas en beloof om iets opwindends te bied aan oud en jonk!

Die opwindende KWEEK!-program is volgeprop met puik aanbiedings wat wissel van musiekteater, toneelstukke, 'n skrywerswerkswinkel (met Nanette van Rooyen), klassieke musiekuitvoerings, koor- en orkes optredes, flamenco en hip-hop dansgroepe, DJ Reddy D, asook 'n jazz kabaret.

Die gewilde afrikaanse rock-groep Zinkplaat tree ook op.

Bespreek jou kaartjies nou!

Hoërskool Stellenbosch hou Opedag!

2008-04-15

Die Hoërskool Stellenbosch se jaarlikse Opedag vir graad 7-leerders en hulle ouers vind op Maandag 12 Mei 2008 plaas.

Registrasie geskied tussen 16h15 en 16h30 en die Opedag duur vanaf 16h30 tot 19h00.

Die Opedag bied aan voornemende Stellies 'n heerlik kykie in die skoollewe van ons skool.

Kom Voel, Hoor, Proe, Ruik en Sien vir jouself!

HSS skryfskool bevorder kreatiwiteit

2008-03-17

Hoërskool Stellenbosch het vanjaar met 'n kreatiewe skryfskool begin wat verskillende genres van die skryfkuns sal ondersoek.

Die skryfskool vind plaas op 'n werkswinkel-grondslag en daar word na onder meer poësie, kortverhale, dramatekste, radiodramas, karaktersketse, lirieke en diskoerse gekyk.

Belangstellendes kom elke Donderdagmiddag vanaf 17h00 tot 18h00 in Lokaal K304 bymekaar om kreatiewe idees en kennis op 'n informele grondslag uit te ruil.

Lucas Heinen is die verantwoordelike persoon.

HSS eindig 4^de in Gerrie Berner tennistoernooi

2008-03-11

HSS se eerste seuns tennisspan het besonder goed gevaar in die Gerrie Berner tennistoernooi deur 4^de uit 12 skole te eindig Die toernooi het vanaf 6 - 8 Maart 2008 plaasgevind, en die kompetisie was besonder sterk aangesien slegs die 12 beste seunspanne vanoor die hele land daaraan deelgeneem het!

Met hierdie prestasie verbeter HSS hul 6^de plek van 2007 met 2 posisies!

Top 4: HSS se eerste seuns tennisspan

In die rondomtalie uitspeelwedstryde het HSS o.a. vir Grey Bloemfontein met 10 - 8 en Kearsney College (Durban) met 17 - 3 geklop. Affies van Pretoria het HSS egter naelskraaps gewen, wat daartoe bygedra het dat HSS onder die Top 4 skole geëindig het.

In 'n senutergende wedstryd teen Hoërskool Waterkloof moes die Stellenbossers uiteindelik die knie buig om met 4 - 5 te verloor nadat die telling 3 elk was ná afloop van die enkelspel-wedstryde.

HSS bedank graag vir Seeff Eiendomme wat ons gedeeltelik borg!