Kry jou HSS 2010 dagboek elektronies!

2010-01-27

HSS se 2010 dagboek kan nou ook elektronies afgelaai word.

Die dagboek is propvol handige inligting, onder andere:

• HSS se pos-, straat en e-pos adresse;
• Telefoonnommers;
• Bankbesonderhede;
• Skoolkwartale;
• Openbare vakansiedae;
• Personeel;
• Leerderrade, VRL, Beheerliggaam en HK;
• Komitees van Beheerliggaam;
• Skool- en volkslied;
• Skooldrag en voorkoms;
• Gedragskode;
• Skoolgelde;
• Erekleure, toekennings en prysuitdeling;
• Skoolrooster;
• Eksamenrooster;
• Dagbeplanning;
• 2010 en 2011 kalenders;
• Kloktye;
• en veel meer!

Kry joune nou!

Graad 8's nou volwaardige Stellies!

2010-01-18

Die eerste week van hoërskoollewe is dikwels een van angs vir nuwelinge, spesifiek vir die graad 8's. Gelukkig het die Matriekraad van 2010 vanaf Dinsdag 12 Januarie tot die Vrydagaand met deeglike voorbereiding gesorg vir hope pret en 'n opbouende verwelkomingsprogram.

Hierdeur is verseker dat die groep hulle voete sommer gou in HSS kon vind. Die verwelkoming het geëindig met 'n seremonie waartydens die graad 8's hul dagboeke ontvang het en as volwaardige Stellies ingehuldig is.

Deur die loop van die week het die groep in verskillende spanne met behulp van hul MR-"offisiere" aan boeresport, ysbrekers, skattejagte, 'n klein atletiekbyeenkoms en konserte deelgeneem.

Die terugvoering van die graad 8's was baie positief.

Baie was hartseer dat die week so vinnig verbygegaan het, ten spyte van al die uitputting!

Die verwelkomingsprogram was as 'n geheel baie suksesvol - 'n positiewe eerste herinnering wat lank onthou sal word!

Matrieks 2009 presteer skitterend in eindeksamen!

2010-01-09

HSS spog nogmaals met 'n 100% slaagsyfer. Van die 109 kandidate wat die eksamen aangedurf het, het 71% van die leerders toegang tot studie aan 'n universiteit verkry, terwyl die orige 29% almal toelating tot verdere diploma- of sertifikaatstudie behaal het.

Stellies het ook 'n reuse oes van:

• 152 A-vaksimbole,
• 195 B-vaksimbole, en
• 192 C-vaksimbole

verwerf!

Veels geluk aan al die matriek leerders wat 'n Top Presteerder in die 2009 Matriek-eindeksamen was:

Katrien van Aswegen (7 A's) *Semper Altior* Rekeningkunde, Afrikaans, Rekenaartoepassingstegnologie, Ekonomie, Engels Huistaal, Lewensoriëntering, Wiskunde

Adriaan Engelbrecht (7 A's) Afrikaans, Ingenieursgrafika, Informasietegnologie, Lewensoriëntering, Fisiese Wetenskap, Wiskunde, Wiskunde Vraestel III

Heléne van Schalkwyk (5 A's) Rekeningkunde, Afrikaans, Lewensoriëntering, Wiskunde, Musiek

(Sien foto's van al die Top Presteerders op die Matriekuitslae-bladsy...)

Baie dankie vir julle harde werk! Ons is trots op julle!

Stellies wen weer Interskole teen Montana!

2009-08-24

Interskole 2009 is 'n byeenkoms wat nog lank onthou sal word! Stellies het behoorlik geskitter, met 4 uit 6 van ons eerste spanne wat koning gekraai het teen Hoërskool Montana!

Die eerste netbalspan het met 27-12 gewen, die eerste meisieshokkiespan het met 2-1 geseëvier, die eerste skaakspan was met 4-3 baas, terwyl die eerste gholfspan met 2-1 as oorwinnaars uit die stryd getree het.

Netbal sterre: Stellies se seëvierende eerste netbalspan wat Montana met 27-12 geklop het!

Stellies het byna skoonskip gemaak, maar die eerste rugby- en seuenshokkiespanne het ongelukkig albei in die laaste 5 minute van hulle onderskeie wedstryde vasgeval.

Die intensiteit en kwaliteit van spel deur al ons spanne was regtig iets besonders om te aanskou.

Welgedaan!

('n Volledige lys resultate kan op die Interskole bladsy gevind word...)

Matrieks van 1989 hou reünie!

2009-08-20

Die matriek-klas van 1989 hou hierdie Saterdag, 22 Augustus 2009, hulle 20-jaar reünie en nooi alle klasmaats hartlik uit om 'n ligte middagete by die Seasons restaurant by die Devon Valley Hotel by te woon.

Die koste beloop R140 vir volwassenes en R70 vir kinders onder 12 jaar, terwyl kinders onder 3 jaar gratis kuier. 'n Ligte buffet-middagete en glas sjampanje is by die prys ingesluit. 'n Kontantkroeg is beskikbaar vir verdere verversings.

Verrigtinge begin om 10h30 vir 11h00 en sal tot so tussen 14h00 en 15h00 duur.

Daarná nooi Winnie almal uit om die aand in styl by De Akker af te sluit!

Belangstellendes moet asb. so gou as moontlik vir Tinka van Dyk (née Klein) kontak by of besoek gerus die reünie se Facebook-groep.

Lees Stellies se jongste nuusbrief!

2009-06-27

Stellies skitter by UK wiskunde olimpiade!

2009-06-18

HSS se leerders het uitstekend presteer by die Universiteit van Kaapstad se wiskunde olimpiade!

James-John Matthee het 'n 1^ste plek behaal in die indiwiduele afdeling vir graad 8 leerders, terwyl Tiana du Preez en Lezanne Lötter 'n 3^de plek in die pare afdeling vir graad 10 leerders verower het!

'n Totaal van 6,329 van die beste wiskunde leerders uit 138 skole vanoor die hele Wes-Kaap het aan die kompetisie deelgeneem. Voorwaar 'n puik prestasie!

Daar is nog twee oorblywende wiskunde olimpiades waaraan Stellies kan deelneem:

• by Hoërskool Montana op 12 Augustus 2009 (koste R10), en
• by Hoërskool Stellenbosch op 14 September 2009 (koste R35).

HSS spog met provinsiale kleure vir hokkie en netbal!

2009-06-17

Hoërskool Stellenbosch is baie trots op al ons leerders wat die Boland hokkie- en netbal-spanne gedurende die Junie-vakansie gaan verteenwoordig!

Euodia Vermeulen, Farell Fortuin, Timothy Apples, Odile Rogers, en Daine Deutchmann het Boland-kleure vir hokkie verwerf, terwyl Annei Kloppers en Tilida Maas die Boland op die netbalbaan gaan verteenwoordig.

Provinsiale spelers: (v.l.n.r.) Euodia Vermeulen, Farell Fortuin, Timothy Apples, Odile Rogers, Daine Deutchmann (almal hokkie), Annei Kloppers en Tilida Maas (netbal)

HSS wens julle alle voorspoed en sukses toe!

Lees die jongste Stellies nuusbrief

2009-05-22

Stellies besoek Amsterdam!

2009-05-15

Gedurende 5 - 18 April was sewe Stellies leerders so bevoorreg om saam met mnr. Mocke 'n opvoedkundige en kulturele besoek aan Het Amsterdams Lyceum te bring.

Die eerste dag is hulle by die skool verwelkom en leerlinge het 'n lesing ontvang oor die geskiedenis en ontwikkeling van Amsterdam. Gedurende die eerste week is klasse bygewoon in Filosofie, Aardrykskunde, Nederlands en Kunsgeskiedenis.

Verskeie geskiedkundige plekke is besoek, o.a. die Anne Frank-huis, Van Gogh museum en die Rijksmuseum. 'n Roeitog op die Amstel-rivier en 'n 75km fietsrit van Volendam na Amsterdam is ook onderneem!

Drie leerders was selfs gelukkig genoeg om hulle Nederlandse ouers op 'n blitsbesoek na Parys te vergesel!

Lees hier vir meer inligting oor die besoek!